Holy images sang “Kalbaryo Year 4: A Lenten Exhibit” gindala sa labing una nga tiun sa probinsya sang Iloilo
Labing una nga tiun nga gindala sa probinsiya sang Iloilo ang Lenten Exhibit sang Confradia dela Virgen Maria en Panay (CVMP).
Sa ika-apat ka tuig, puwede mabisitahan ang lenten exhibit sa Sta. Barbara Parish Church nga may tema “Kalbaryo Year 4– Luha, Gugma, Himaya: Dalan padulong sa aton kaluwasan.”
Suno kay Sta. Barbara SB Member, Dr. Cha Badon, isa sa mga katuyuan sa pagbutang sang exhibit sa guwa sang syudad ang pagpalapta sang istorya sa kalbaryo ni Hesukristo.
Madugay nga ginplanuhan sang CVMP ang pag-expand sang exhibit tubtob nag-imbitar sila sang mga lokal nga kamareros nga magapasakop, suno kay Dr. Badon.
Ginahandom man sang grupo nga ilugon sang iban nga simbahan ang kasubong nga lihok agud ilabe pa nga mapalapit sa Ginuo ang mga tumuluo kag pamalandongan ang mga pag-antos sang manunubos.
Sa kabug-usan nga exhibit, 50% sang mga ginpangbutang nga imahen halin sa Sta Barbara samtang ang nabilin ang gin-transport pa halin sa La Paz, Jaro, Molo kag Antique.
Matandaan nga ginbutang ang Lenten Exhibit sang 2021 sa Sta. Maria Church sa City Proper; 2022 sa Our Lady of Peace and Good Voyage Parish sa La Paz; kag 2023 sa Jubilee Hall sang St. Clements Church sa La Paz.
Bukas sa publiko ang exhibit subong nga tuig tubtob Marso 16 halin las-8 sa aga tubtob las-6 sa gab-i sa Sta. Barbara Parish Church.
