Suspek sa pagpatay sa negosyante sa Sablogon, Passi City nadakpan

ILOILO CITY — Nadakpan sa hot pursuit operation kahapon ang suspek sa pagpatay sa negosyante nga si Rosella Andrada sa Barangay Sablogon, Passi City kahapon sang aga.   

Suno kay Police Lt. Col. Banjo Clarite, hepe sang Passi City Police Office, ginkilala ang suspek kay July “King” Palma, 44-anyos sang Barangay Cabunga, Passi City.   

Nadakpan ang suspek tungod positibo siya nga gintudlo sang testigo.

Ginpahayag ni Clarite nga personal nga kilala sang testigo ang suspek tungod yara gid siya sa lugar sang gintiro ang biktima.        

Indi pa sa subong ma-establisar sang Passi City police ang motibo sa krimen subong man ang koneksyon sang suspetsado sa biktima.

Una na ginsugid ni alyas Inday, timbang sang biktima, nga nagabantay sa kaha ang iya amo sang may nagdulog nga naka-motorsiklo, nagsulod sa baligyaan kag nagbakal tubtob nga gintiro ang negosyante.

Ginpanginwala naman ni Palma, nga siya ang nagpatay kay Andrada.

Suno kay Palma, nagapamunyag siya sang tanum sa ila duta sa Barangay Buyo sang amo man nga banwa.

Maka-witness suno sa iya ang mga manugtapas sang tubo kag iya bata kun diin siya sang natabo ang pagpatay kay Andrada. Natingala na lang si Palma kun ngaa gindala siya sang pulis. — via BBB