WVSU administration gin-ako nga may leakage sa College Admission Test

ILOILO CITY — Ginkumpirmar ni West Visayas State University (WVSU) Public Affairs and Marketing Communication Head, Dr. Hazel Villa nga may natabo nga leakage sang mga questionnaires sa bag-o lang matapos nga College Admission Test (CAT) sang unibersidad sang Marso 10.

Ini ang nagguwa sa inisyal nga resulta sang imbestigasyon sang Special Investigation Committee, ang gintukod nga komitiba sang WVSU administration.

Suno kay Dr. Villa, natukiban sang komitiba nga may mga pareho nga items sa WVSUCAT questionnaires apang indi pa niya matumod kun ano ka damo.

“WVSU has determined in its initial investigation today, March 14, that there is indeed a leakage of items in the WVSU CAT,” pahayag ni Villa.

Sa karon, ginahibalo pa sang komitiba kun paano naglapta ang nasambit nga test papers kag kun pila ang nalab-utan sang leakage.

Ginakondenar naman sang WVSU ang natabo nga leakage kag nagpabutyag nga magapangatubang sang penalidad ang mapamatud-an nga yara sa likod sang leakage.

“The university strongly condemns the cheating that ensued following the leakage. Individuals found responsible for the leakage will face the full force of the law, based on its findings,” dugang pa ni Villa.

Ginapangabay naman sang WVSU sa publiko nga maghulat sang final result sang investigation sa masunod nga semana.