9 ka oras nga sunog nagtupok sang 2 ka heritage buildings sa Calle Real

ILOILO CITY — Naglawig sang siyam ka oras ang sunog nga naglamon sang duha ka heritage buildings sa Calle Real, sa Iznart Street kag JM Basa Streets, City Proper.

Una nga nasunog las 11:16 kagab-i, Marso 15, ang tatlo ka panalgan nga Divinagracia building sa Iznart Street sa diin nahamtang ang Touch Corner Minimart kag D&K Fashion Botique sa ground floor kag Emerald Finance Corporation sa second floor.

Pasado las 2:00 kaina sang kaagahon, naglaton ang kalayo sa 3rd floor kag second floor sang Dominican building sa JM Basa Street nga kaiping sang Divinagracia building.

Wala sang may na-trap sa sunog tungod wala sang nagatulog diri, pero may isa ka bombero ang gin-report nga na-suffocate apang yara na sa estable nga kondisyon. Wala man naglaton ang kalayo sa magtimbang nga kilid sang Divinagracia kag Dominican buildings tungod sa firewall.

4TH ALARM

Naglab-ut sa 4th alarm ang sunog.

Gin-ako sang mga bombero kag fire volunteers nga nabudlayan sila sa pagpalong sang kalayo tungod nagatalikdanay ang duha ka buildings. Sa atubang lang pwede maka-papiswit sang tubig rason nga nagabalik-balik ang madamol nga aso kag kalayo.

Naggamit sang crane boom ang mga bombero agud mapiswitan sang tubig ang mataas nga porsyon sang duha ka buildings pero tungod kulang ang tubig sang mga firetrucks nagabalik-balik ang kalayo. Nagakuha pa sang tubig ang mga firetrucks sa Jaro.

Ginpataas sang BFP sa second alarm ang sunog las 11:46 kagab-i, third alarm las 12:55 kaina sang kaagahon kag fourth alarm las 2:20 kaina antes gindeklarar nga under control las 5:42 sang kaagahon.

Gindeklarar sang BFP nga fire out las-8:25 kaina sang aga.

Ginabanta nga masobra P8 million ang kahalitan sang sunog. —via Angel Mae Ciudad/Farrah Mae Morano/Maria Kayla Tingzon