HeadlineLokal

Sunog nagluntad sa Poblacion Ilaya, Zarraga

ILOILO — Ginpuhag sang daku nga sunog ang mga residente sang Sitio Tondo, Barangay Poblacion Ilaya, Zarraga kaina sang udto.

Sa inisyal nga impormasyon sang Aksyon Radyo Iloilo nag-umpisa ang kalayo sa tunga-tunga nga porsyon sang sitio kag madasig nga naglapta tungod sa ikit-ikit kag human sa light materials nga mga pamalay.

 Sa data halin sa barangay officials, 17 ka pamalay kag 27 ka pamilya ang apektado sang sunog.  

Gintudlo sang residente nga si alyas Evelyn ang balay ni Teresa Jinon nga ginhalinan sang kalayo kag naglapta sa madamo nga pamalay.        

Wala naman sang may gin-report nga napilasan ukon na-trap sa sunog.

Suno kay Teresa, yara siya sa kusina sang ila balay sang nakita nga nagakalayo ang ila kwarto gani naghingagaw siya sa pagguwa.

Wala gid sang may gindala nga bisan isa ka bayo si Teresa tungod sang madasig nga paglapta ang kalayo sa iban nga mga pamalay.

Si Teresa lang ang nabilin sa ila balay tungod naga-obra ang iya mga kabataan.

Wala naman siya sang ideya kun ano ang ginhalinan sang kalayo sa kwarto tungod wala man sang may nakasaksak nga appliances.        

Apang gin-ako niya nga nagahampang sang isahanon sa sulod sang kwarto ang iya hinablos antes ang pag-ibwal sang kalayo. — via Aksyon JS Pamplona

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply