Baba sang lalaki wasak sang ginlabu sa Maasin
ILOILO — Wasak ang baba sang lalaki sang ginlabu sa Brgy. Cabangcalan, Maasin pasado las-12 sang hapon sang Sabado de Gloria.
Ginkilala ang biktima kay alyas Roger, 46-anyos samtang ang suspect amo si alyas Ben, 26-anyos lunsay residente sang amo nga barangay.
Base sa inisyal nga imbestigasyon sang Maasin police, una nga nag-istoryahanay ang biktima kag amay sang suspect sa balay man sang suspect.
Pagkatapos sang pag-istoryahay sang duha, hinali lang nga ginlabu sang suspect ang biktima sa wala pa mahibaluan nga rason.
Suno kay PMaj. Jose Nemias Pamplona, hepe sang Maasin Municipal Police Station, wala man sang pagbinaisay ukon komosyon nga natabo antes natabo ang pagpanglabu.
Nakaagum sang pilas nga ginhalinan sang pagkapihak sang baba sang biktima nga gin-refer na sa Ramon Tabiana Memorial District Hospital sa Cabatuan para sa dugang nga pagbulong.
Samtang, nadakpan naman ang suspect kag presu na sa Maasin Police Station.
Na-recover naman ang binangon nga gingamit sa pagpanglabu.
