Jeepney driver patay sang gintiro sang iya kasilingan sa Cabatuan
ILOILO — Dead-on-arrival sa ospital ang jeepney driver sang gintiro sang iya kasilingan sa Barangay Tiring, Cabatuan kagab-i, Marso 31.
Suno kay Norma Fuentes, tiya sang biktima nga ginkilala kay Novie Zanarias, nakabati siya sang duha ka lupok kag nakita na lang niya nga nagahapaon ang iya hinablos sa atubang sang tiyangge sang suspect nga si Marlon Paguidian.
Samtang, ginpahayag sang bata ni Zanarias nga malagyo pa kuntani ang suspect kag nagsulod pa sa balay sang iya paryente pero naabtan sang mga pulis nga nagresponder gilayon sa crime scene.
May pilas sang pagkatiro sa ulo ang biktima.
Suno kay Police Executive Master Sergeant Mary Ann Liba, deputy chief sang Cabatuan Police Station, ginhambalan sang suspek ang biktima nga maghalong samtang naga-backing sang jeep tungod nakaagi ini hulog sa kanal.
Pero naakig ang biktima tubtob nga nagbaisay sila.
Nagpanaug sa jeep ang biktima nga may dala nga screwdriver kag ginhanaan ang suspek.
Nagsulod ang suspetsado sa iya tiyangge kag nagkuha sang pusil kag gintiro ang biktima.
Na-recover sang Cabatuan police ang 38 caliber revolver sang suspek kag screwdriver sang biktima.
