Masobra 800 ka eskwelahan sa W. Visayas nag-suspend sang F2F classes tungod sa mataas nga heat index
ILOILO CITY – Nagtimbuok sa masobra 800 ka mga eskwelahan sa Western Visayas ang nag-suspend sang face-to-face classes kag nag-shift sa alternative delivery mode, base sa data sang Department of Education (DepEd) 6.
Suno ini kay DepEd 6 Public Information Officer Hernani Escullar, Jr., tungod sa mataas nga heat index ukon ang kapaang nga nabatyagan sang lawas sang tawo.
Sa 840 ka mga eskwelahan nga nag-suspend sang face-to-face classes, kalabanan diri ang paagi sa deklarasyon sang local chief executives magluwas lang sa Guimaras sa diin school heads ang nagdeklarar sa pag-shift sa alternative delivery mode.
Ginabug-usan ini sang 66 ka mga eskwelahan sa Schools Division of Iloilo City; 35 sa Iloilo province; 70 sa Bacolod City; 50 sa Roxas City, Capiz; 91 sa Kabankalan City; 39 sa Silay City; 96 sa Guimaras; 62 Himamaylan City; 47 sa Bago City; kag 284 sa Negros Occidental.
“The monitoring and evaluation shall be instituted to ensure learning continuity despite this situation. That means nga kita sa DepEd i-ensure gid naton nga ang learning competencies sang aton sini nga mga kabataan nga ila gid maangkon even though yara sila sa comfort kag safety sang ila panimalay,” suno kay Escullar.
Sa Iloilo City, suspendido ang klase halin sa pre-school tubtob senior high school kun indi magnubo sa 40 degree Celsius ang forecasted heat index sang PAGASA.