Pamilya nga naga-estar sa overpass sa La Paz nahatagan na sang ilistaran
ILOILO CITY — Nakasaylo na sa ginhatag sa ila nga relocation site ang pamilya ni alyas Toto, ang construction worker nga nag-estar upod sa iya asawa, tatlo ka kabataan kag hinablos sa overpass sa Luna Street, La Paz.
Sa pag-check sang Aksyon Radyo Iloilo, ginhatagan sang burugsukan sang balay sa relocation site sa Sambag, Jaro ang pamilya ni Toto.
Nagpasalamat man siya sa Aksyon Radyo Iloilo kag sa City Government tungod ginpamatian ang iya ginapangayo nga mahatagan sila sang ilistaran.
Temporaryo nga nagplastar sang trapal ang pamilya ni alyas Toto sa wala pa matapos nga balay sa tupad sang lote nga ginhatag tungod wala pa mahawanan ang ila ilistaran.
Ginpahayag niya nga hawanan niya ini buwas agud maumpisahan na ang pagkay-o sang iya balay.
Madumduman nga ipa-demolish ni Iloilo City Mayor Jerry Treñas ang overpass sa Luna St., La Paz tungod gina-estaran sang mga nagalihu-liho.
