Masobra 700 ka local officials sa Iloilo, Guimaras kag Neg. Occ. matambong sa regional oath taking sang Partido Federal ng Pilipinas sa Abril 10
ILOILO — Gina-ekspektar ang masobra 700 ka mga local officials sa Iloilo, Iloilo City, Guimaras kag Negros Occidental nga matambong sa regional oath taking sang Partido Federal ng Pilipinas sa Abril 10, la-una sang hapon.
Sa inisyal nga impormasyon sang Aksyon Radyo Iloilo, walo ka mga opisyal sa Iloilo City ang masumpa sa partido, lakip si Executive Assistant Raisa Treñas-Chu, ang bata ni Mayor Jerry Treñas nga una na nagpahayag nga mapadalagan bilang Congresswoman sa siyudad, kag Vice Mayor Jeffrey Ganzon.
May 22 man ka mga opisyal halin sa Guimaras kag pila ka local officials halin sa Negros Occidental nga masumpa.
Sa pagpangusisa sang Aksyon Radyo Iloilo, 21 sa 43 ka mga mayors sa probinsiya ang nagpabutyag sang interest nga masumpa sa PFP.
Magluwas sa mga alkalde, may mga barangay kapitan kag board members man nga matambong sa oath taking.
Pangunahan ni PFP President, South Cotabato Governor Reynaldo Tamayo, Jr. ang oath taking ceremony.
Ginapaabot man si Special Assistant to the President, Secretary Antonio Lagdameo, Jr. kag si Ilocos Norte 1st District Rep. Ferdinand Alexander “Sandro” Marcos.
Ang PFP ang ulihi nga partido nga gin-intrahan ni Iloilo Gov. Arthur Defensor, Jr. kag amo man ang partido ni President Ferdinand Marcos, Jr. sang 2022 presidential elections.