Iloilo City Councilor Urminico Baronda, Jr. ginkakasan sang 3 ka committee chairmanship sa city council

Nadulaan sang tatlo ka mga committee chairmanship si City Councilor Urminico Baronda, Jr. makaligad gin-aprubahan sa city council ang proposal nga nagadeklarar nga bakante ang tanan nga komitiba sa special session kahapon, Abril 8.

Gin-aprubahan sang mayoriya sang mga konsehal ang proposal ni Majority Floor Leader Frances Grace Parcon-Torres.

Nagpamangkot pa si Baronda sa konseho kun ano ang rason sa pagdeklarar nga bakante ang tanan nga committee chairmanship, apang wala wala may ginhatag nga sabat ang mga konsehal. 

Tungod sini, nagkadto sa councilor Alan Zaldivar ang committee on health, sanitation, and hospital services, samtang ang committee on education, science, and technology ang paga-uyatan naman ni Councilor Rudolph Jeffrey Ganzon.  

Pamunuan naman ni Councilor Jose Maria Miguel “Migs” Treñas ang committee on information, technology and computerization.

Gin-athag ni Councilor Baronda nga wala siya sang kalain sang buot sa iya mga kaupod sa konseho.

Nagpasalig siya nga magapadayon gihapon ang pagserbisyo niya sa konseho bisan wala na siya sang gina-uyatan nga komitiba. — via Aksyon Justice Savannah Pamplona