Ginpatindog nga warehouse sang construction supply sa Oton ginransak

ILOILO — Nadiskubrihan nga nagkaladula ang electrical wirings kag pila pa ka mga gamit sa ginapatindog nga warehouse sang construction supply sa Barangay Tagbac Sur, Oton mga kahapon sang aga, Abril 28.

Suno kay Police Staff Seargent Elvin Sañol, imbestigador sang Oton Municipal Police Station, nagkadto sa lugar ang mga naga-ubra agud magkuha sang dugang nga stock sang construction supplies nga dal-on sa ila shop sa Arevalo sang nakita nga nagkaladula na ang pila ka mga gamit.

Dugang pa ni Sañol, may nagabantay sa lugar kada gab-i pero natabuan nga may event sa ila gina-ubrahan nga shop kagab-i gani nagpauli sila tanan.

Sang gin-check sang mga naga-ubra ang area, wala na ang breaker sang kuryente, wirings kag motor sang tubig nga bag-o lang gintakod, lakip na ang mga lamesa kag puwertahan.

Napahamtang sa Radial Road ang warehouse gani wala gid sang kaiping nga mga pamalay samtang wala naman sang naka-install nga CCTV tungod ginapaubra pa lang ini. — via Aksyon Maria Kayla Tingzon