HeadlinePulis

Groom sa Calinog gindakop pila ka oras antes ang iya kasal tungod sa kaso nga murder

ILOILO – Napaslawan nga makatambong ang lalaki sa iya kasal tungod ginserbehan sang warrant of arrest sa kaso nga murder, pila ka oras antes ang iya kasal sa Brgy. Marandig, Calinog.

Suno kay Police Major Fernand Limbungan, hepe sang Calinog Police Station, subong nga adlaw ang schedule sang mass wedding nga pasakupan kuntani sang lalaki pero gindakop siya pasado las-singko kahapon sang kaagahon, Abril 30.

Sang 2012 pa ang kaso ni Alyas Nito tungod natiruhan niya ang iya tiyo sang nag-agaway sila sang pusil.

Sa pagpangusisa sang police, na-settle na sang suspek kag sang iya tiya nga asawa sang biktima ang kaso sa lebel sang barangay pero na-file ang complaint sa piskalya tubtob nagsaka sa korte gani gindagdagan siya sang warrant of arrest.

Nag-ayo pa kuntani ang pamilya sang groom nga patapuson lang ang kasal tungod preparado na ang punsyon pero wala ginpasugtan sang police tungod salabton nila ini sa korte.

Ginpa-athag sang police sa groom nga may mga proseso nga dapat sundon agud masolbar ang iya kaso sa korte.

Ginpanugyanan ni Limbungan ang groom nga solbaron anay ang kaso antes magpakasal kag nagpasalig siya nga mamaninoy sila nga mga police.

Preso pa tubtob subong sa Calinog Municipal Police Station ang groom. — via Firingline

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply