Masobra tunga sa milyon ka pesos nga balor sang suspected shabu na-recover sa mag-live-in partner sa Mandurriao
Masobra tunga sa milyon nga balor sang suspected shabu ang na-recover sa mag-live-in partner sa Dungon C, Mandurriao kahapon, Mayo 2.
Suno kay Police Captain Gimel Acuesta, team leader sang City Drug Enforcement Unit (CDEU), nadakpan kanday alyas Sipil, 44-anyos nga tumandok sang Oñate de Leon, Mandurriao, kag alyas Eva, 34-anyos nga taga-Guzman-Jesena.
14 ka sachets sang suspected shabu nga nagabug-at sang 80 grams kag may standard drug price nga P544,000 ang na-recover sa duha.
Magluwas diri suno kay Acuesta, may nakita man ang police nga papel sa diin may nakabutang nga mga “alyas” nga posible may kaangtanan sa illegal activities sang duha.
Naka-agi na preso sa kaso may kaangtanan sa illegal drugs ang lalaki samtang gin-ako sang babaye nga nagagamit na siya sadto sang illegal drugs, suno sa police.
Ginahibalo pa sang police ang ginakuhaan sang mag-partner sang supply sang illegal drugs nga ginabaligya sa bilog nga Mandurriao. — via Farrah Mae Morano
