Aganan Flyover wala pa sang pat-ud kun san-o mahuman
ILOILO – Posible duha ka tuig pa ang hulaton antes mahuman ang construction sang flyover sa Aganan, Pavia, suno kay Sangguniang Bayan (SB) Member Pyt Trimañez.
Ginhimo ni Trimañez ang pahayag sang ginplastar ni Engr. Sanny Boy Oropel, officer-in-charge sang Department of Public Works and Highways (DPWH) 6, ang resulta sang mga ginhimo nga test sa Aganan Flyover, sa session sang Sangguniang Bayan sang Pavia kaina.
“Nagpatigayon sila sang pagtuon, ang DPWH Region 6, ginkumparar nila ang iya ka UTCP (United Technology Consolidated Partnership) nga design [sa Aganan Flyover] kag suno kay Engr. [Sanny Boy] Oropel ‘tama gid ka layo kag daku ang deperensiya sang ila nga study.’ Ang sa UTCP ang kadalumon lang is average of 20 to 28.5 meters whereas sa ila [sang DPWH 6] ti kinahanglan 43 meters gid para malab-ot ang hard strata,” suno kay Trimañez.
Ginakwestiyun man sang konsehal ang rekomendasyon sang DPWH 6 nga makuha pa sang third party consultant agud magdeterminar kun ano nga data ang dapat sundon.
“Ang ila recommendation, magakuha pa gid sang isa ka third party consultant just to determine kun sin-o gid bala, kag ano gid bala nga data ang ensakto and amo man na ang basehan kun padayunon ang pag-ubra sang Aganan Flyover ukon may iban pa gid nga intervention nga paga-ubrahon,” dugang pa niya.
Nagakinahanglan pa suno kay Trimañez ang DPWH 6 sang dugang nga pondo agud magkuha sang third party consultant.
Ginapa-abot na sang Sangguniang Bayan nga madugayan ini tungod mabudlay kun magpangayo sang pondo halin sa gobyerno. Kinahanglan man nga maghulat agud matapos ang pagtuon sang third party consultant kag pagpaguwa sang ila rekomendasyon.
Una na nga gin-suspend sang DPWH 6 ang construction sang P802-million flyover tungod sa problema nga nakita sa proyekto. Sa pihak sini, gin-report sang DPWH 6 nga yara na sa 72 percent ang completion sang proyekto. — via Aksyon Firingline