Iloilo City Congw. Julienne Baronda nagsumpa sa Lakas CMD

Nagsumpa sa Lakas–Christian Muslim Democrats (Lakas-CMD) Party si Iloilo City Congresswoman Julienne “Jam-jam” Baronda kahapon, Mayo 7.

Ginpangunahan ni Lakas-CMD President kag House Speaker Martin Romualdez ang oath taking sa opisina niya sa House of Representatives.

Kadungan ni Baronda nga nagsumpa sa partido kanday Reps. Menchie “Ching” Bernos sang lone district sang Abra kag Kristine Tutor sang 3rd district of Bohol.

Halin sa Nacionalista Party kanday Bernos kag samtang halin sa National Unity Party (NUP) si Congresswoman Baronda nga kapareho nga partido ni City Mayor Jerry Treñas.

Natabo ang pagsumpa ni Congw. Baronda makaligad ang “political break-up” nila ni Mayor Treñas.

Una na ginkumpirmar ni Iloilo Governor Arthur Defensor, Jr. nga masumpa sa Partido Federal ng Pilipinas (PFP) ang bata sang alkalde nga si Raisa Treñas-Chu nga mapadalagan sa pagka-kongresista sa Iloilo City sa 2025 midterm elections. — via Aksyon Justice Savannah Pamplona