“Istoryahan ta ang pulitika sa Oktubre [2024]” — Iloilo City Congw. Julienne Baronda
ILOILO CITY – Temprano pa agud istoryahan ang pulitika sa Iloilo City, suno kay Congresswoman Julienne Baronda.
Ginhimo ni Baronda ang pahayag sang nagsaylo siya sa Lakas–Christian Muslim Democrats (CMD) nga partido si House Speaker Martin Romualdez halin sa National Unity Party (NUP) sang Mayo 7.
Wala direkta nga ginsabat sang kongresista kun kabahin sang iya plano sa masunod nga eleksyon ang pagsaylo niya sang partido. Sa pagkamatuod suno sa iya, madugay na siya nga ginahaylo nga magsaylo sa Lakas-CMD.
Gin-aku ni Baronda nga wala pa siya sang plano para sa 2025 midterm elections kag mas maayo kun istoryahan lang ini sa Oktubre sa tiun sang filing sang certificate of candidacy.
Sugod sang “political break-up” nanday Congresswoman Baronda kag Iloilo City Mayor Jerry Treñas, wala sang statement nga ginpaguwa ang kongresista para sa iya plano sa 2025 elections.
Pananglitan nga magpadalagan liwat para sa iya katapusan nga termino si Baronda, mabunggu-anay sila ni Raisa Treñas-Chu, bata ni Mayor Treñas, tungod gindeklarar na sang alkalde ang kandidatura sang iya bata sa masunod nga eleksyon. — via Aksyon Hotline