HeadlineLokal

Lalaki nabuka ang kneecap sang nakabulasot sa drainage nga wala sang tabon malapit sa Parola Wharf

ILOILO CITY – Nagalaum ang concerned citizen nga maaksyonan ang drainage nga wala sang tabon sa atubang sang City Mall sa Parola Terminal sa City Proper.

Ini tungod nakabulasot sa drainage ang iya bayaw samtang nagalakat padulong sa parking area malapit sa mall pasado las-11 sang gab-i sang Mayo 7.

Base sa Facebook post ni Faith Jordan, makita ang lalaki nga nagakaya sa higad sang dalan samtang gina-uyatan ang iya wala nga tuhod.

Sa interview sang Aksyon Radyo Iloilo kay Jordan, bag-o lang nakadungka ang fiber boat nga ginsakyan nila papuli halin sa Guimaras tungod nag-attend sang pre-pageant sang Miss Guimaras kaupod ang ila production team.

Kaupod ni Jordan ang iya bayaw nga technical director sang pageant.

Samtang nagalakat pakadto sa ila salakyan, ginpahayag ni Jordan nga madulom ang lugar kag wala sang streetlights.

Nakabati na lang sila nga may “nag-crack” tungod una sila nga nagalakat samtang nagasunod ang iya bayaw. Sang pagkabati nila, gilayon nga ginpadulungan ang natabuan sang aksidente kag naabtan nga nagahuray-ad na ang iya bayaw.

Sa panaysayon ni Jordan nga nabuka ang kneecap sang iya bayaw tungod sa natabo. Nagtawag sang medical response team ang mga nakakita kag nagresponder ang katapo sang Bureau of Fire Protection.

Ipaidalum sa surgery ang technical director sa Biyernes, suno kay Jordan.

Base sa pagpangusisa sang Aksyon Radyo Iloilo, indi ini ang labing una nga may nakabulasot sa drainage nga ginabanta nagadalom sang duha ka tapak.

Nag-post man siya suno sa iya sa Facebook agud mapaandaman ang publiko ilabe na ang masami nga nagalabay sa lugar. — via Aksyon Paula Elambayo

aksyonradyoiloilo

Aksyon Radyo Iloilo is the No. 1 station in both AM and FM bands in Iloilo based on April and September 2023 and June 2024 Kantar Media surveys.

Leave a Reply