Mga atleta sang Iloilo province nga nakapauli sang medalya sa WVRAA 2024 makabaton sang cash incentives
ILOILO — Makabaton sang cash incentives ang mga Ilonggo athletes lakip ang ila coach kag chaperones kun nakapauli sang medalya sa bag-o lang natapos nga Western Visayas Regional Athletic Association (WVRAA) Meet 2024 nga ginhiwat sa Bacolod City.
Ini ang pinaagi sa Provincial Ordinance 2000-217 sa diin mahimo nga makabaton sang P5,000 ang gold medalists; P3,000 ang silver medalists kag P2,000 naman ang bronze medalists.
Suno kay Iloilo Governor Arthur Defensor, Jr. mabaton sang mga atleta ang ila mga incentives apang wala pa sang pat-ud nga petsa tungod nagakinahanglan sang maid-id nga proseso ang pag-release sang pondo.
Ginpasalamatan naman ni Defensor ang tanan nga ginikanan, coaches, chaperones kag mga athletes tungod sa ila dedikasyon nga makahatag sang pasidungog sa probinsiya.
Nagpasalamat man siya sa kooperasyon sang mga empleyado sang provincial capitol sa paghiwat sang varsity program kag development leagues nga nagpabaskog sang kinaadman sang mga atleta sa nagkalain-lain nga sporting events.
“It’s not only the winning but our gains in the area of sports. What is important is the values formation of our athletes. Because if we win here, indi lang na ang medalya. It’s really the values formation that we want to happen when we play sports,” pahayag pa ni Defensor.
Nagpasalig naman ang gobernador sang iya nga suporta para sa palaabuton nga palarong pambansa sa July 11-15, 2024 sa Cebu City.
Una na nga gindeklarar nga overall champion ang Iloilo sa WVRAA Meet 2024. — via Aksyon Cedrick Anona