RoRo vessel halin sa Bacolod City padulong sa Dumangas na-stranded sa tunga sang lawod
ILOILO – Masobra na apat ka oras nga na-stranded sa tunga sang lawod ang RoRo vessel sang Montenegro Shipping Lines, tatlo ka kilometros ang kalayuon sa Dumangas port.
Manug-las kuwatro sang hapon sang naghalin ang M/V Maria Wynona sa Bacolod City sakay ang 161 ka mga pasahero kag 25 ka mga cargoes, base sa manifesto. Samtang, las-6:16 sang nakabaton sang report ang Philippine Coast Guard nga na-stranded sa tunga sang lawod ang RoRo vessel.
Suno kay PCG Ensign El John Ga, na-stranded sa tunga sang lawod ang RoRo vessel tungod sa low tide.
Base sa impormasyon sang PCG halin sa kapitan kag management, kahapon lang nagsugod sa pagbyahe sa amo nga ruta ang barko kag ini ang labing una nga tiun nga madungka sa Dumangas gani wala na-antisipar ang sitwasyon sang dagat.
Nag-augment ang isa ka barko sang Montenegro Shipping Lines agud ma-rescue ang mga pasahero kag madala sa Dumangas port.
Nagapadayon man ang imbestigasyon sang PCG sa natabo. — via Aksyon Farrah Mae Morano