Jeepney driver nasapwan nga patay sa sulod sang CR sang gasolinahan sa Mandurriao
ILOILO CITY — Nagadunglay na ang ulo sang senior citizen nga driver samtang nagapungko sa toilet bowl sang CR sang gasoline station sa Q. Abeto, Mandurriao sang nasapwan nga patay sang Mayo 11 sang gab-i.
Suno kay Police Captain Val Allan Cambel, hepe sang Mandurriao Police Station, las-5 kahapon sang hapon nakita sa CCTV footage ang pagsulod sang 70-anyos nga jeepney driver sa CR sang gasolinahan.
Ginpahayag ni Cambel nga indi na maayo ang panglakat sang tigulang base man sa kuha sang CCTV camera.
Nasapwan ang senior citizen sang gin-check sang staff sang gasoline station ang CR para kuntani manirado na. Apang sang nanuktok ang staff, wala sang may nagsabat rason nga ila ginbuksan kag didto na nakita-an ang tigulang.
Ginabanta sa lima ka oras ang gintenir sang senior citizen sa CR antes siya nasapwan.
Wala pa mahibaluan sang Mandurriao police ang gintunaan sang kamatayon sang driver nga indi taga-Iloilo City.
Wala pa sang himata nga nagpakig-angut sa police agud mag-claim sa bangkay. — via Aksyon Paula Elambayo