Bridge alignment sang Panay-Guimaras-Negros Bridge ginsuguran na — DPWH 6
ILOILO — Ginsuguran na sang duha ka Korean-based consultants nga Yooshin Engineering Company kag Dasan Consultants ang bridge alignment sa ginaplano nga Panay-Guimaras-Negros Bridge.
Ginapanan-aw sang Department of Public Works and Highways (DWPH) 6 ang bridge alignment nga importante nga proseso sa ilabe sa pagdihon sang Detailed Engineering Design (DED).
Suno kay DPWH 6 Director, Engr. Sanny Boy Oropel, katuyuan sang bridge alignment nga madeterminar ang insakto nga pahamtangan sang mga haligi sang taytay.
Antes pa man ginhimo ang alignment, may mga konsultasyon na sa mga apektado nga Local Government Units (LGUs) kapareho sang Iloilo kag Guimaras.
Base sa ginpaguwa nga timeline sang DPWH, umpisahan ang pag-procure sang civil works sa una kag ikaduha nga quarter sang 2025 kag ginalauman nga matapos sa Hunyo 2028.
Samtang, posible nga maabot na ang mga equipment nga gamiton para sa soil exploration agud nga matumod ang klase sang duta sa diin ipahamtang ang mga haligi sang taytay.
Target nga matapos sang consultant ang DED lakip na ang mga sections sini sa December 2025 kag masugod ang construction sa ikatatlo nga quarter sa amo man nga tuig.
May kalabaon nga 32.47 kilometers ang taytay nga masugod ang section A sa Leganes, Iloilo pakadto sa Buenavista, Guimaras kag halin sa San Lorenzo, Guimaras pakadto sa Pulupandan, Negros Occidental.
P184.57 billion ang ginpa-in nga pondo para sa nasambit nga taytay nga nalakip ang pagtapos sang una nga phase sa mga mandu ni President Ferdinand Marcos, Jr. — via Aksyon Cedrick Anona