Numero sang mga barangay nga rasyonan sang tubig nagdamo sang nagsugod ang water rationing sa siyudad; Pila ka barangay sa listahan indi pa kinahanglan rasyonan
Nagdamo ang numero sang mga barangay nga pagarasyonan sang tubig sang ginsuguran ang water rationing sang Mayo 15.
Base sa listahan sang City Disaster Risk Reduction and Management Council ukon CDRRMC, halin sa 25, nahimo na nga 93 ang mga barangay ang hatagan sang tubig.
Gin-athag ni General Services Office head, Engr. Neil Ravena nga nagadugang ang numero kun may magtawag nga barangay ukon pumuluyo nga nagakinahanglan sang tubig.
Base naman sa pagpangusisa sang Aksyon Radyo Iloilo, may pila ka mga barangay sa listahan nga indi pa kinahanglan rasyonan sang tubig tungod may bastante nga water supply.
Isa sa mga barangay ang Benedicto, Jaro nga suno kay Punong Barangay Abelardo Salting, bastante ang tubig sa mga bomba sa barangay.
Magluwas sini, may unod man ang static water tank malapit sa ila barangay hall.
Ginpahayag ni Salting nga sang may nag-deliver sa ila sang tubig sang Martes, ginhambalan niya nga irasyon lang sa iban nga barangay tungod wala nagaproblema sa tubig ang iya mga residente. — via Aksyon Hotline
