Babaye nga pasahero sang salakyan patay sang nabungguan sang motorsiklo sa Guimbal
ILOILO — Patay ang 57-anyos nga babaye nga pasahero sang pribado nga salakyan sang nabungguan sang motorsiklo sa Brgy. Nanga, Guimbal kahapon, Mayo 16.
Suno kay Police Corporal Ave Gay Miles, imbestigador sang Guimbal Municipal Police Station, nagliko pa-wala ang salakyan nga ginamaneho sang 85-anyos nga lalaki, kag pasulod na kun tani sa gasolinahan sang gulpi lang nagbunggo ang motorsiklo nga papuli na sa Miagao.
Ginpahayag sang police nga madasig ang pagpadalagan sang 19-anyos nga driver sang motorsiklo gani nawasak ang tuo nga porsyon sang salakyan sa diin nagapungko ang 57-anyos nga live-in partner sang 85-anyos.
Ginhingagaw pa dala sa ospital ang babaye pero gindeklarar nga dead-on-arrival tungod sang pilas sa ulo, suno sa police.
Napilasan man ang driver sang salakyan.
Ginabulong naman subong sa ospital ang driver sang motorsiklo samtang ginabantayan sang police. — via Aksyon Farrah Mae Morano
