Lalaki patay sang gintiro sang riding-in-tandem sa Calinog

ILOILO — Dead-on-arrival sa ospital ang 48-anyos nga lalaki sang gintiro sang wala pa makilal-an nga mga suspetsado sa Brgy. Libot, Calinog pasado las-8:30 kahapon sang aga, Mayo 22.

Ginkilala ang biktima kay Joseph Sonza, residente sang Brgy. Libot, Calinog.

Suno sa bata sang biktima, nagbakal sang sulud-anon sa banwa ang iya amay upod ang iloy kag manghod sakay sang motorsiklo sang natabo ang pagpangluthang.

Samtang papuli na sa ila balay ang iya mga ginikanan, ginsita kag ginpapundo sila sang mga suspetsado nga nagadulog sa higad.

Sang ginpapundo, namangkot ang biktima sa mga suspek kun ano ang iya sala.

Ginpapanaog pa sa motorsiklo ang iloy kag ang manghod sang gintiro sa ulo ang iya amay.

Suno kay Police Major Myles Dieron, hepe sang Calinog Municipal Police Station, wala napilasan ang mag-iloy nga upod sang biktima.

Indi pa matul-id sang kapulisan ang motibo sa pagpangluthang tungod wala pa nila na-istorya ang pamilya sang biktima. — via Aksyon Paula Elambayo