54-anyos nga lalaki patay sang nalumos sa Tigbauan

ILOILO — Patay ang 54-anyos nga lalaki sang nalumos samtang nagalangoy sa beach resort sa Baguingin, Tigbauan kahapon, Mayo 26.

Suno kay Police Master Seargent Amy Jerlyn Acevedo, imbestigador sang Tigbauan Municipal Police Station, nag-abot sa resort ang biktima upod ang iya pamilya tungod may yara sang selebrasyon.

Sa pagpangusisa sang police, yara na sa impluwensiya sang makahulubog nga ilimnon ang biktima kag nagdiretso na lang sa dagat para maglangoy tubtob nakalab-ot sa madalum nga porsyon kag nalumos.

Wala naga-ulan sang natabo ang insidente pero dalagko ang balod, suno sa police.

Ginhingagaw sang mga nagapaligo kag mga life guards nga maluwas ang biktima kag madala sa ospital pero gindeklarar nga dead-on-arrival. — via Maria Kayla Tingzon