Police Station sa ICare building sa Mandurriao target buksan sa Hunyo

ILOILO CITY — Target nga buksan sa masunod nga bulan ang dugang nga police station sa Mandurriao nga pagatawgon Police Station 8.

Suno kay Police Major Shella Mae Sangrines, spokesperson sang Iloilo City Police Office, ipahamtang sa I CARE building sa compound sang Gaisano ICC sa Diversion Road sa Mandurriao ang nasambit nga police station.

Dugang pa ni Sangrines, may napili na nga hepe para sa Police Station 8 kag kun ano nga mga barangay ang sakop sini.

Una na ginpabutyag ni Sangrines nga katuyuan sang pagbutang sang dugang nga police stations nga mapalapit ang mga pulis sa komunidad kag mapadasig ang pag-responder sa mga insidente.

Magluwas sa Police Station 8, may ginpahamtang man nga Police Station 7 sa ICare Building sa Tanza Esperanza, City Proper nga target man buksan sa Hunyo. — via Aksyon Angel Mae Ciudad