Clearing operations sa mga drainage system ginmandu sang DPWH bilang preparasyon sa tig-ululan

ILOILO — Nagapanghanda na ang Department of Public Works and Highways (DPWH) 6 sa pag-umpisa sang tig-ululan, suno kay DPWH 6 Director, Engr. Sanny Boy Oropel.

Lakip sa mga preparasyon sang ahensya amo ang pagmando sa mga district engineering offices nga maghimo sang clearing operations sa mga gina-agyan sang tubig ilabe na gid sa mga drainage systems.

Ginhimo ni Oropel ang pahayag sa pilot episode sang Kapihan sa Bagong Pilipinas program.

Gina-schedule suno sa iya, ang clearing operations sa mga drainage systems sa rehiyon agud mangin matalunsay ang pag-ilig sang tubig kag malikawan ang pagbaha kun mag-umpisa na ang tig-ululan.

“All the district engineering offices are required to do clearing operations, especially on our [waterways] we are doing it per schedule before the offset of [the] rainy season so naga-on going ang aton nga maintenance activity for all the clearing operations for the whole region,” suno kay Oropel.

Samtang, ginpabutyag naman ni Oropel nga apektado ang maintenance programs sang DPWH tungod sa “budget cut” sang national government apang ginahimo nila ang nasambit nga operasyon agud mabuligan ang mga district engineering offices bisan pa nga indi na ila obligasyon ang pagtatap sa canal kag drainage systems.

Ginpa-athag man niya nga Local Government Units ang may responsibilidad sa pagpatinlo kag pagpahawan sang mga water ways sa ila nasakupan. — via Aksyon Cedrick Anona