Mud flow halin sa Bulkan Kanlaon nag-apekto sa pila ka lugar sa Negros

Nakuhaan sang video ang mabaskog nga daludo sang tubig nga may dala nga abo sa Brgy. Masulog, Canlaon City, Negros Oriental, sa tiilan lang sang Kanlaon volcano.

Natabo ini kahapon, Hunyo 5 ukon halos duha ka adlaw pagkatapos nga naglupok ang Kanlaon volcano sang Hunyo 3 sang gab-i.

Sa video nga kuha ni Kagawad Steve Bolivar, makita ang pagdaludo sang tubig nga daw gin-mix nga semento sa Padudusan Falls.

May isa pa ka video ang netizen nga si Drylle Demafilis nga nagapakita sang mud flow sa Baji-Baji Falls.

Suno kay Canlaon City Mayor Jose Chubasco Cardenas, temprano pa kahapon sang gin-abisuhan ang mga residente nga mag-aligmat tungod nag-ulan kag may posibilidad nga mag-abot sa ubos ang abo nga ginbuga sang naglupok ang bulkan.

Ginpanugyanan ang mga pumuluyo nga indi mag-panic kag magsunod gid sa instruction sang mga otoridad.

Nag-issue naman sang Lahar Advisory ang Phivolcs para sa Bulkan Kanlaon tungod sa gina-forecast nga mabaskog nga pag-ulan sa Negros Island subong nga adlaw.

Tungod sini, daku ang posibilidad suno sa Phivolcs nga may pagdaludo sang tubig nga may dala nga abo halin sa bulkan.