Driver sang truck pilason sang natiruhan sang kasubong nga driver sa Pavia

ILOILO — Pilason ang lalaki sang natiruhan sang iya kaupod sa trabaho sa garahe sang trucking sa Barangay Balabag, Pavia kagab-i, Hunyo 6.

Ginkilala ni Balabag, Sta. Barbara Tanod Commander John Ablanida ang biktima kay alyas Glen, ginabanta 40-anyos nga may pilas sa tyan.

Suspek sa insidente si Andrian Latoza sang Lambunao, Iloilo.

Suno kay Ablanida, yara siya sa talyer nga tupad sang garahe sang nakabati siya sang isa ka lupok kag ginsundan sang duha pa gid ka sunod-sunod.

Gulpi lang nabatian ni Ablanida nga nagsinggit ang asawa ni Glen kag nakita nga duguon nga nagguwa sa garahe ang biktima.

Nakita ni Ablanida nga nagpalagyo pakadto sa direksyon sang Sta. Barbara ang suspect. Nagbulig naman responder ang mga tanod sang Balabag, Sta. Barbara.

Ginpabutyag ni Ablanida nga antes ang insidente, nagbakal sang ilimnon ang duha kag gindala sa ila garahe.

Gindala na sa ospital ang biktima samtang ginapangita subong sang kapulisan ang suspect paagi sa hot pursuit operation.

Na-recover naman sang police ang pusil nga gingamit sang suspect sa boundary sang Pavia kag Sta. Barbara.

Magkaiping nga barangay ang Balabag, Pavia kag Balabag, Sta. Barbara. — via Aksyon Farrah Mae Morano