Contractor sang multi-purpuse building sa Katilingban, Molo nanindugan nga indi delayed ang proyekto
ILOILO CITY — Indi delayed ang pag-obra sa multi-purpose building sa Katilingban, Molo.
Ini ang ginpanindugan ni Mr. Pepito Guevara, president sang Pitong Builders and Construction Supply, Inc. nga kontraktor sang multi-purpose building.
Yara na sa phase 2 suno sa iya ang proyekto kag natalana matapos sa Agosto subong nga tuig.
Paathag ni Guevara, wala man sang slippage ang ila pag-obra tungod wala pa natapos ang ila kontrata para sa phase 2.
Sa pagkamatuod, naga-ayo sila nga hawanan sang mga residente kag barangay ang obstruction sa area kasubong sang baligyaan kag mga naka-park nga motor kag tricycle agud mas masulhay ang ila pag-obra.
Sigehon sang kontraktor ang pag-obra sa multipurpose building base sa ila kontrata tubtob nga may direktiba na halin sa DPWH-Iloilo City District Engineering Office.
Sang Lunes, nagpasar sang resolusyon ang Iloilo City Council nga naga-revoke sa otoridad sang DPWH-ICDEO nga mag-implementar sang pito ka nagapadayon nga proyekto sa siyudad tungod “delayed” na. Isa ang multi-purpose building sa Katilingban sa pito ka proyekto.
Wala sang ginplastar nga legal basis ang konseho natuhoy ila tikang. — via Aksyon Justice Savannah Pamplona
