Pagtunga sa Iloilo City sa 2 ka legislative districts magasolbar sang pagkontrahanay sa pulitika sa siyudad — former Sen. Franklin Drilon
ILOILO CITY — Nagapati si former senator franklin drilon nga magasolbar sang pagkontrahanay sa pulitika ang pagtunga sa Iloilo City sa duha ka legislative districts.
Sa partial opening sang Sunset Boulevard kahapon, Hunyo 23, ginpahayag sang anay senador nga suportado niya ang plano tungod makahatag ini sang mas madamo nga proyekto sa siyudad.
Mangin solusyon man ini suno sa iya sa “political contest” sa tunga nanday incumbent Congresswoman Julienne “Jam-jam” Baronda kag bata ni Mayor Jerry Trenas nga si Executive Assistant Raisa Trenas-Chu nga una na ginkumpirmar mapadalagan sa pagka-kongresista sa 2025 midterm elections.
Ginpahayag ni drilon nga kuwalipikado ang siyudad nga tungaon sa duha ka legislative districts kag bisan siya ang ma-apelar man kanday House Speaker Martin Romualdez kag Senate President Chiz Escudero agud ma-aprubahan ang proposal.
Kun suguran subong ang pagtalakay sa proposal, mapasar ang lihok antes ang eleksyon apang magadepende ini suno sa iya sa mga lideres sa Kongreso.
Una nga ginduso ang hagna sang 2019 sa diin mangin first legislative district ang Jaro, La Paz kag Mandurriao, samtang pagabug-usan naman sang City Proper, Molo, Arevalo, kag Lapuz ang second legislative district. — via Aksyon Justice Savannah Pamplona
