Mga century-old display sa Museo Iloilo ginakahangaw-an nga madasig maggabok sang ginbawi sang city gov’t ang gin-donar nga aircon; Museum naggamit na lang sang air cooler
ILOILO CITY — Nakabaton sang lima ka units sang air cooler halin sa private individual donor ang Museo Iloilo sang ginbawi sang Iloilo City Government ang gin-donate nga airconditiong units.
Suno sa source sang Aksyon Radyo Iloilo nga pagkatapos ginbawi sang General Services Office (GSO) sang city government ang mga kagamitan nga una gindonar ni former Iloilo City Mayor Jed Patrick Mabilog, nagakahangawa ang tagdumalahan sang Museo Iloilo nga madasig nga magdaan, maggabok, ukon maguba ang mga display ilabe na ang tinuig nga mga display.
Lakip na diri ang mga textiles nga human sa abaka kag pinya kag nagakinahanglan sang kontrolado nga temperatura agud ma-preserve sang madugay.
Una na nga gin-report nga lakip sa mga ginbawi sang city government sa Museo Iloilo ang nagkalain-lain nga kagamitan lakip na ang air conditioning unit nga kinahanglan sa pag-preserve sa mga gamit nga naka-display. Ginpaathag sang city government nga ginbakal ang nasambit nga kagamitan paagi sa pondo sang gobyerno gani indi puwede nga madonar sa private foundation.
Magluwas sa air cooler, nakabaton man sang donasyon ang Museo Iloilo halin sa amo nga donor sang hagdanan kag manual water pump nga lakip man sa ginbawi sang siyudad. — via Aksyon Marvin Malificiar
