Subject sa drug buy bust operation patay sang natiruhan tungod ginpahayag nagbato sa mga operatiba sa Mina
ILOILO— Dead-on-arrival sa ospital ang subject sang drug buy bust nga natiruhan sang ginpahayag nga nagbato sa mga operatiba sa Brgy. Badiangan, Mina kahapon, Hulyo 1.
Ginkilala ang napatay kay Alnie Talamor, 48 anyos sang Janipaan Central, Cabatuan.
Ginpahayag ni Captain Ryan Christ Inot, team leader sang Regional Police Drug Enforcement Unit (RPDEU), nga nag-ayo ang subject nga si Talamor nga sa Brgy. Badiangan lang himuon ang transaksyon.
Nagsakay sa motorsiklo si Talamor samtang nagasunod ang upod niya nga si Jorel Leso, 40-anyos sang amo man nga barangay, sakay sa iya salakyan kag naghulat sa manugbakal sang illegal drugs, suno sa police.
Ginsaysay ni Capt. Inot nga sang nag-abot ang police poseur buyer, gindaho ni Talamor ang suspected shabu sa diin nagpakilala gilayon ang pulis nga iya katransaksyon.
Tungod sini suno sa police, naggabot sang pusil si Talamor kag gintiro ang operatiba pero wala naigu tungod nakalikaw, suno sa police.
Nagdalagan si Talamor sa talamnan gani ginlagas sang operatiba. Samtang nagapalagyo, liwat nga nagpalupok si Talamor suno sa police, gani nadanlog ang operatiba sa kahon.
Nagbalos palupok ang pulis kag naigu ang subject sa wala nga butkon kag natumba.
Gindala sa ospital ang subject pero gindeklarar nga dead-on-arrival.
Nadakpan, suno sa police, ang kaupod sang subject nga si Leso nga himata sang asawa ni Talamor.
Na-recover sa salakyan ni Leso ang P4.9 million nga balor sang suspected shabu kag ang pusil ni Talamor.
Sa impormasyon halin sa police, may record pa gid si Talamor nga robbery sa Lambunao kag Calinog, murder with the use of unlicensed firearm sa Iloilo kag isa pa ka robbery sa isa ka bangko. — via Aksyon Farrah Mae Morano
