“Wala sang reported nga POGO sa aton” — Iloilo City Mayor Jerry Treñas
ILOILO CITY — Wala sang may gin-report nga operasyon sang Philippine Offshore Gaming Operator (POGO) sa siyudad, suno kay Mayor Jerry Treñas.
Una na nga nagpaguwa sang executive order ang alkalde nga indi pagpasugtan sang Iloilo City Government ang anu man nga operasyon sang POGO agud maproteksyunan ang mga Ilonggos kag mapabilin ang kalinong kag katawhay sang siyudad.
Sa pihak sini, kumpyansa si Treñas nga nagahulag ang intelligence community ilabe na ang mga kapulisan sa Iloilo City Police Office (ICPO) agud ma-imbestigaran ang mga ginasuspetsahan nga POGO operation.
Ginpatawag man niya ang mga punong barangay sa siyudad agud hingyuon nga gilayon i-report sa mga otoridad kun may mga ginadudahan nga POGO operations sa ila barangay agud ma-usisa.
Base sa EO sang alkalde, indi pagpahanugutan ang mga aktibidad nga maka-expose sa mga Ilonggo sa human trafficking, illegal gambling, kag iban pa nga illegal activities nga gina-angut sa POGOs.
