Aksyon Radyo Iloilo Number na naman sa Iloilo sa Kantar Media Survey
Nagapabilin nga Aksyon Radyo Iloilo ang nagapanguna nga radio station nga ginapamatian sa Iloilo.
Ini sang gindominar sang Aksyon Radyo Iloilo ang June 2024 radio listenership survey sang Kantar Media. Gin-conduct ang survey sang Hunyo 7 tubtob 13 gamit ang Radio Diary-Computer-Assisted Telephone Interviewing nga method.
Sa tanan nga AM stations, ang Aksyon Radyo Iloilo nakakuha sang 35.18% share. Nagpangaduha ang Bombo Radyo nga may 33.61% share, kag pangatlo ang RMN nga may 27.39% share.
Sa 14 ka AM kag FM stations naman sa Iloilo, nagpanguna gihapon ang Aksyon Radyo Iloilo nga may 28.50% share; nagpangaduha ang Bombo Radyo Iloilo, may 27.39% share; samtang pangatlo ang RMN nga may 22.19% share.
Madumduman nga number 1 man sang Aksyon Radyo sa April 2023 kag September 2023 survey sang Kantar Media; 2nd quarter survey sang Kantar Media sang 2018; kag 3rd quarter survey sang AGB Nielsen kag 4th quarter survey sang Kantar Media sang 2016.
Ang Aksyon Radyo Iloilo ginkilala man sang Kapisanan ng mga Brodkaster ng Pilipinas ukon KBP nga Best Provincial AM Station sa 24th KBP Golden Dove Awards.
Hugot nga nagapasalamat ang Aksyon Radyo Iloilo sa tanan nga tagpalamati sa padayon nga pagsuporta kag pagsalig sa estasyunan.
Ginapasalig sang Aksyon Radyo Iloilo ang padayon nga pagdala sang patas nga pagbalita, dekalidad nga mga programa, kag matuod kag tampad nga serbisyo publiko sa mga Ilonggo kag Filipinos sa diin man nga bahin sang kalibutan.
