Masobra tunga sa milyon ka pesos ginbilin nga kahalitan sang sunog sa West Habog-Habog, Molo

ILOILO CITY—Masobra tunga sa milyon ka pesos nga balor sang kahalitan ang ginbilin sang sunog sa Brgy. West Habog-habog, Molo kagab-i, Hulyo 23.

Suno kay Fire Officer 2 Earl Anthony Daroca sang Iloilo City Fire Station, base sa ila Standard Operating Manual, P504,000 ang balor sang kahalitanan sang sunog.

Wala pa diri malakip ang balor sang kahalitan sa nasunog nga mga gamit sang mga residente, suno sa iya.

Sa subong, indi pa matumod sang BFP kun ano ang ginhalinan sang sunog. Gina-validate naman nila ang impormasyon nga short circuit ang gin-umpisahan sang sunog.

Ginpabutyag ni Kagawad Climente Lucenie nga ginatudlo sang mga residente nga nag-umpisa ang kalayo sa balay ni Viberly Villanueva tubtob naglaton sa kaiping nga mga pamalay.

Una nga gin-report sang barangay nga anum ka balay ang nasunog, pero ginpabutyag sang BFP nga pito tanan ka balay ang nasunog.

Gindeklarar nga fire out las-7:54 sa gab-i. — via Aksyon Farrah Mae Morano