Mangingisda sa Guimbal napilasan sang gin-atake sang bagis

ILOILO— Napilasan sa paa ang 40-anyos nga manugpangisda sang gin-atake sang bagis sa kalalawran sang Guimbal kahapon sang aga, Hulyo 29.

Suno kay Nonoy, 44-anyos nga residente sang Brgy. Cabubugan, Guimbal, isahanon siya nga nagpalawod las-5 sang kaagahon sakay sa iya baroto.

Pag-abot sa lawod, naghulog siya sang lambo kag samtang nagahulat sang mahulik, nagpungko siya anay sa dulong sang sakayan nga nagakapay-kapay ang mga tiil sa dagat.

Ginpabutyag ni Nonoy nga nanotisyaran niya na lang nga may sirik nga nagalabaw sa dagat. Ginpatihan pa niya una nga sun fish lang ini, pero sang ulihi natukiban nga bagis ang nagapadulong na sa iya.

Gulpi nagtindog sa sakayan si Nonoy, pero ginpahayag niya nga nalab-ut sang bagis ang iya tuo nga paa gani napilasan.

Nagbunggo pa ang bagis suno sa iya sa tarik kag nagpalak-palak gani nahulog siya sa tubig. Nagkupo sa tarik si Nonoy agud indi malumos, samtang ginakagat sang bagis ang iya nga shorts kag nagisi.

Makaligad ang apat ka minutos, nagpalayo man ang bagis gani nagdali-dali saka sa sakayan ni Nonoy kag nagpauli.

Ginbulong ni Nonoy ang pilas antes nagpadulong sa sentro para sa dugang nga pagbulong.

Ini na ang ikaduha ka beses nga gin-atake si Nonoy sang bagis. Natabo man ini sa iya sang nagpangisda siya sa Concepcion, Iloilo sang 24-anyos pa lang siya. — via Aksyon Farrah Mae Morano