Transport cooperatives sa Iloilo City indi pabor sa plano nga i-suspend ang PTMP
“Indi [dapat] nga kami (transport cooperatives) ang magsakripisyo kay gasunod lang kami sa programa sang gobyerno.”
Ini ang ginpabutyag ni Mr. Winefredo Dublezo, Jr., Gen. Manager sang Alliance for Peace and Sustainable Development kag sekretarya sang Western Visayas Alliance of Transport Cooperative sand Corporations, Inc. (WVATCCI) sa ginhimo nga press conference sang transport alliance subong nga hapon.
Ini may kaangtanan sa pagpamatuk sa ginaplano sang senado nga pag-file sang resolusyon nga nagahingyo kay President Ferdinand Marcos, Jr., nga suspenderon ang Public Transportation Modernization Program (PTMP).
Suno kay Dublezo, ang amo nga tikang nanday Senate President Chiz Escudero kag Senator Raffy Tulfo ang pasikat lang tungod sa nagahilapit nga eleksyon.
Suno naman sa representante sang CITSCO, ang pagsuspender sang PTMP magapalala lang sang financial condition sang mga kooperatiba, kun diin pila na ka pabor ang ginahatag sang sektor kapareho sa pagpahanugot sang first town jeepneys nga makabiyahe sa ila ruta kag mga colorum nga wala ginadakup sang LTO kag LTFRB.
Dugang pa sang natungdan, malayo na ang naabot sang PTMP umpisa sang ginpatuman ini sa syudad sang Iloilo kun diin linibo ka indibidwal ang nakaangkon sang obra tungod diri.
Ang tindug naman sang ITRANSCO, dapat buligan sila sang gobyerno imbes nga daw kapareho nga ginagipit sila sang sitwasyon.
Base naman sa LETRANSCO, daku ang nabulig sang modernization program sa commuting public tungod sa pagpaninguha man sang kooperatiba paagi sa pagsunod sa plano sang gobyerno.
Tungod sini, ma-file sang resolusyon ang transport alliance nga iga-upod sa iban pa nga transport cooperatives sa pungsod bilang pagpamatuk sa suspension.
Sa pihak sini, nagapati ang alyansa nga 99% indi pagpaboran sang presidente ang pagsuspender sini.
Suno naman kay Mr. Perfecto Yap, consultant sang WVATCCI, mapasa man sang kaugalingon nga letter of request ang transport alliance sa opisina ni President Marcos nga i-exempt ang syudad sa suspension pananglitan paboran niya ini.
Dugang pa ni Yap, pananglitan madayon ang suspension mahimo sang transport holiday ang mga kooperatiba agud ipalab-ut sa gobyerno ang huol nga dala sini sa ila kag sa mga commuters. — via Aksyon Marvin Malificiar
