Lalaki nga may pilas sang pagkatiro sa tiyan nasapwan patay sa Guimbal

ILOILO — Ginapadalman sang Guimbal police ang motibo sa pagpatay sa 41 anyos nga lalaki nga nasapwan nga may pilas sang pagkatiro sa Barangay Barangay Bongol San Miguel, Guimbal kahapon sang aga, Hulyo 30.

Sa pagpangusisa ni Police Captain Beverly Cataluña, hepe sang Guimbal Municipal Police Station, naglisensya ang biktima nga si Nichol Getayo sang Barangay Binanua-an, Guimbal, nga magpangumpay mga las-6 sang aga.

Nanotisyaran sang iloy sang biktima nga adlaw na pero wala pa siya nakapauli gani ginpangita nila tubtob nasapwan si Getayo nga patay na pasado las-10 sang aga.

Nagaguwa sa imbestigasyon sang police nga may nabatian nga sunod-sunod nga lupok ang mga residente nga malapit sa lugar sa diin nasapwan ang biktima, pero wala nila ginsapak.

May pilas ang biktima sa likod nga naglusot sa iya tiyan, suno sa police.

Sa paglantaw sang police, may pukotay kag lagsanay pa antes gintiro si Getayo kun basehan ang nagkalahapay nga mga hilamon sa lugar.

Indi pa gid matumod sang police ang motibo sa krimen tungod nagapadayon pa ang imbestigasyon.

Sa impormasyon nga nakuha sang police sa mga residente, medyo masabad ang biktima ilabe na kun naka-inum kag ginapatu-patuan man sa pagpangawat pero ginpabutyag sang iloy nga wala man napamatud-an. — via Aksyon Maria Kayla Tingzon/Farrah Mae Morano