60-day preventive suspension sa Punong Barangay sang San Isidro, Jaro ginrekomendar sang Iloilo City Council kay Mayor Jerry Treñas
Ginrekomendar sang Iloilo City Council ang 60 day-preventive suspension sa punong barangay sang San Isidro, Jaro.
Sa gin-file nga resolution, ginahingyo nga suspenderon ni Mayor Jerry Treñas si PB Ronela Domopoy Juaneza tungod sa ginpasaka nga reklamo sang barangay kagawad nga misconduct, abuse of authority, kag anti-graft and corrupt practices.
Gintumod man ni Councilor Rex Marcus Sarabia, chairman sang Committee on Personnel, Good Government, Public Accountability, and Oversight, nga wala masunod ni Kapitan Juaneza ang Government Procurement Act.
Sa ginpatawag nga committee hearing, wala man ginpanginwala ni Juaneza, suno kay Sarabia, nga wala nakapaidalum sa bidding ang pila ka ginareklamo nga items.
“NAGBALOS SILA SA AKON”
“Ari na di ang tanan nga resibo… wala na ya sang napaguwa nga kuwarta nga wala na-document. Bisan kadtuan nila, ari di tanan may record.”
Ini ang pahayag ni San Isidro, Jaro Punong Barangay Ronela Juaneza sa akusasyon nga may iregularidad sa gin-release nga P818,000 pesos nga pondo sang barangay sa pagbakal sang pila ka items pareho sang well-milled rice kag bulong sa mga senior citizens sang Disyembre 2023 tubtob Enero 2024.
Suno kay Juaneza, nagbalos lang ang mga barangay kagawad nga nag-file sang reklamo batuk sa iya sa Iloilo City Council. Ginrekomendar kahapon sang Iloilo City Council kay Mayor Jerry Treñas nga suspendiron si Juaneza sang 60 ka adlaw.
“Nagbalos lang na sila sa akon kay nga-a? Gin-filan ko na sila sang case sa Ombudsman kay halin sang pagpungko ko gid, all documents was (sic) not presented. Asta subong ang Barangay San Isidro wala sang financial statement from 2019. Naga-reenact lang na sila kay wala nasira ang ila libro halin 2019 asta subong,” suno kay Kapitan Juaneza.
Gintumod ni Juaneza nga ginkasuhan niya ang tanan nga barangay kagawad, lakip si anay Kapitan Felix Doreza. Tanan suno sa iya nga nagdaug nga kagawad ang magkaupod sa isa lang ka grupo, samtang siya ang independent candidate.
Gin-akusaran ni Juaneza ang mga barangay kagawad nga luyag siya pahalinon agud matabunan ang wala ma-liquidate nga pondo sang barangay sang sila pa ang nagapamuno. — via Aksyon Justice Savannah Pamplona, PM Reports
