Anay Punong Barangay Ernie Poral sang Ingore patay sang gintiro sa Baldoza, La Paz
ILOILO CITY — Napuhag ang mga residente kag nagabaligya sa talipapa sa Baldoza, La Paz sang nakabati sang lupok sang pusil kag nakit-an ang nagahuray-ad nga lawas ni anay ingore punong barangay ernie poral pasado las 6 kaina sang aga.
Suno kay Barangay Kagawad Reynold Blam sang Baldoza, nagabakal sang bubod si Poral sang gintiro sang wala makilala nga suspetsado,
Sa pagpangusisa sang aksyon radyo news team, upod sang biktima ang iya asawa apang nagbulagay sila pag-abot sa talipapa.
Suno naman sa manugbaligya sang bubod nga si alyas Laila, nakita niya nga nag-park sa likod sang awto ni Poral ang suspek nga nagasakay sa motorsiklo, nagpalapit sa anay kapitan kag gintiro sa ulo.
Sang natumba, ginbalikid pa sang suspek ang biktima kag liwat gintiro. Gilayon nga nagsakay sa motor ang suspek kag nagpalagyo.
Ginpahayag ni Laila nga na-agsikan pa sang dugo ang estudyante nga bata nga nakalabay sa lugar pakadto sa eskwelahan.
Gindala ospital ang anay kapitan apang gindeklarar nga dead-on-arrival las 8:50 kaina sang aga suno kay Police Staff Sergeant Michael Soleño, imbestigador sang La Paz Police Station.
