Ginatudlo lookout sa pagpatay kay former PB Ernie Poral na-capture sang CCTV

ILOILO CITY — ILOILO CITY – May nagsunod nga motorsiklo kanday former Punong Barangay Ernie Poral kag iya asawa sang nagbiya sila sa ila balay sang Agosto 5, las-5:41 sang kaagahon, pila ka oras antes siya ginpatay.

Base sa kuha sang CCTV camera, nakuhaan ang lalaki nga nagasakay sa N-Max nga motorsiklo, naka-itom nga jacket, naka-itom nga pedal short, naka-itom nga helmet nga may orange nga visor nga naglabay sa atubang sang balay sang pamilya Poral.

Pag-abot sa unahan mga 50 metros ang kalayuon sa balay ni Poral nag-U-turn ang motorsiklo kag nag-hazard.

Las-5:42 sang kaagahon, nagsakay ang mag-asawa sa salakyan kag naglakat, kag nakita sa kuha sang CCTV nga nagsunod ang nakamotorsiklo nga lalaki. Base pa sa footage, nagagamit sang cellphone samtang nagamaneho ang lalaki nga naka-motorsiklo.

Ginakabig sang police nga lookout ang lalaki. Pero ginatun-an man sang police kun posible nga ang lookout man ang nagpatay sa anay kapitan.

Base pa sa inisyal nga imbestigasyon sang police, pag-abot sa La Paz Public Market, posible nga nagtimbre ang lookout sa suspek nga sakay si Poral sa salakyan nga iya ginasundan. Nagpadulong sa merkado ang mag-asawa nga Poral agud magpangape.

Pasado las-6 sa aga, ginpatay si Poral samtang nagabakal sang bubod sa talipapa sa Baldoza, La Paz.

Base naman sa interview sang Aksyon Radyo Iloilo sa isa ka residente, mga tatlo ka semana ang nakaligad, may lalaki nga daw kaangay nga nagapanilag sa guwa sang balay sang pamilya Poral.

May nakahitsura sa ginpahayag nagapanilag kag positibo niya nga gintudlo si Nilo Guardaya sang Igcocolo, Guimbal, ang suspect sa pagpatay sa anay Kapitan, nga amo ang nagapanilag sa guwa sang balay.

Tungod sini, kumbinsido ang pamilya Poral nga si Guardaya ang suspect sa krimen. — via Aksyon Marvin Malificiar