Former PB Ernie Poral may 2 ka pilas sa ulo base sa autopsy result
ILOILO CITY — Igo sa likod sang tuo nga dulunggan kag tuo nga parte sang ulo ang naagum ni anay Ingore, La Paz Punong Barangay Ernie Poral base sa autopsy result.
Sa pag-autopsy ni Medico Legal officer, Dr. Owen Libaquin, naigo sa tuo nga porsyon sang ulo si Poral nga naglapos sa wala nga porsyon sang ulo. Sa amo nga igo, posible nga nagatupong-tupong lang ang height sang suspek kag biktima.
Sa pagpangusisa sang Aksyon Radyo Iloilo news team, 5’4 ang height ni Poral base sa resulta sang autopsy, samtang 5’5 tubtob 5’6 naman ang height sang suspek nga si Nilo Guardaya, suno sa iya asawa.
Base man sa autopsy, sa una pa lang nga igo sang bala, patal na ang pilas rason nga nabuka ang bagol sang biktima.
Sa kuha sang CCTV, ginpalapitan sang suspek si Poral kag gintiro. Sang natumba ang biktima, ginbalikid pa siya sang suspek kag gintiro liwat.
May igo man sa likod nga tuo nga dulunggan ang biktima sa diin nasunog ang iya skin tissue ukon panit nga agi sang paglupok sang pusil.
May nakita man nga smudging ukon pintok-pintok sa idalum nga porsyon sang dulunggan nga inagyan sang gun powder.
Wala nakaguwa ang slug sa likod nga porsyon sang dulunggan base sa autopsy result. Halin sa .9mm nga pusil ang slug.
Ginkumpirmar naman ni Iloilo City Police Office (ICPO) Director, PColonel Kim Legada nga .9mm ang basiyo sang bala nga na-recover sa crime scene. — via Aksyon Maria Kayla Tingzon
