Lalaki na-capture sa CCTV camera nga nagkuha sang tablet sa kalan-an sa Pavia
ILOILO — Ginapangita subong sang Pavia police ang lalaki nga na-capture sa CCTV camera nga nagkuha sang tablet computer sa counter table sang kalan-an nga Mr. Pares sa Pandac, Pavia.
Natabo ang insidente sang Agosto 7, las-2:14 sang kaagahon.
Suno kay PMSgt. Rolando Arellano, Jr., imbestigador sang Pavia MPS, gin-report sang nagabantay sa counter nga napiyungan siya sang natabo ang insidente.
Nabatyagan na lang niya nga may nagkalas sa counter kag nakita nga wala na ang tablet nga naka-charge.
Footage sa pagkuha sang lalaki sang tablet sa kalan-an sa Pavia | via Mr. Pares FB
Suno pa sa nagabantay, ginagamit nila ang tablet sa pag-audit sang ila nga negosyo kag may iban pa sensitibo nga unod.
Base sa CCTV footage, nakasuksok ang lalaki sang itom nga long sleeves kag pula nga kalo. Wala sang tabon ang histura sang lalaki.
Wala na sang iban pa nga CCTV camera malapit sa lugar nga posible makatudlo kun diin nagpadulong ang lalaki pagkatapos ang pagpangawat.
Ini na ang ikatatlo nga kaso sang kinawatay nga natabo sa Pavia sang damlag lang, suno kay Arellano. —via Marvin Malificiar
