“The Ernie Poral Murder Case”
Si Ernie Poral, ang former punong barangay sang Ingore, La Paz.
Agosto 5, las-5:41 sang kaagahon, sang nagbiya sa ila balay si Poral kaupod ang iya asawa nga si Vangie sakay sa ila salakyan kag nagpadulong sa La Paz Public Market agud magpangape. Las-5:42 sang nakita sa CCTV footage ang lalaki nga naka-motorsiklo nga nagsunod sa mag-asawa nga ginapatihan lookout sa krimen.
Manug las-7 sang aga, ginpatay si Poral samtang nagabakal sang bubod sa talipapa sa Baldoza, La Paz.
Base sa kuha sang CCTV camera, ang suspek nagasakay sa motorsiklo, naka-helmet, naka-backpack kag nagasuksok sang itom nga jacket. Ginpalapitan sang suspek si Poral kag gintiro. Sang natumba ang biktima, ginbalikid pa siya sang suspek kag gintiro liwat.
AUTOPSY RESULT
Naigo sa tuo nga porsyon sang ulo si Poral nga naglapos sa wala nga porsyon sang ulo. Sa amo nga igo, posible nga nagatupong-tupong lang ang height sang suspek kag biktima.
Base man sa autopsy, sa una pa lang nga igo sang bala, patal na ang pilas rason nga nabuka ang bagol sang biktima. May igo man sa likod sang tuo nga dulunggan ang biktima sa diin nasunog ang iya skin tissue ukon panit nga agi sang paglupok sang pusil.
PAANO NAKILALA ANG SUSPEK?
Suspek sa krimen si Nilo Guardaya, tumandok sang Igcocolo, Guimbal. Kilala si Guardaya nga nagapangsarahe sang kahoy sa ila barangay.
Mga las-6 sa gab-i sang Agosto 5, nadakpan si Guardaya kaupod si Jerson Gentapao. Nagasakay sa motorsiklo ang duha sang nagdulog sa Girado-Magsaysay, Guimbal agud magpasilong tungod naga-ulan.
Ginpahayag ni Iloilo City Police Office (ICPO) Director Police Colonel Kim Legada nga nasundan sang kapulisan ang suspetsado. “Nagbase kita sa witness account, base lang didto sa iya nga mga ginsuksok nga gamit, ang iya panglakat, kag ang iya hitsura nga may nakakita prior sang natabo.”
Sa CCTV footage nga natipon sang police, ginsundan sang suspek nga nagasakay sa motorsiklo nga itom ang biktima halin sa La Paz Pubic Market tubtob sa Baldoza, La Paz sa diin natabo ang krimen.
Pagkatapos sang insidente, nagpadulong sa Ticud, La Paz ang suspek, naglabay pa-Tacas, Jaro, diretso sa C1 Road sa Oton padulong sa Guimbal, suno sa police.
Ginpahayag ni Police Captain Marlon Perez, hepe sang La Paz Police Station, nga nakilal-an si Guardaya tungod may tricycle driver nga nakatanda sang iya nga hitsura antes natabo ang krimen. Nakit-an sang driver ang hitsura sang suspect tungod gin-uba niya ang iya helmet sang nag-inom siya sang tubig sa vending machine sa merkado.
May ginpakita ang police nga rogues’ gallery sa testigo kag gintudlo niya si Guardaya.
Nagapanindugan si Mrs. Vangie Poral nga si Guardaya ang nagpatay sa iya bana. Suno sa iya, may nagpanugid sa ila sadtu nga antes natabo ang pagpatay sa iya bana, may duha ka tawo nga naga-surveillance sa ila balay. Ang hagyon suno sa iya sang lawas sang suspek ang nagasantu gid kay Guardaya ilabe na ang kataasaon, may buy-on kag kalbo.
Sa interview naman kay Ingore, La Paz Punong Barangay Charity Montelijao, hinablos sang anay kapitan, may ihibalo ang pamilya Poral nga may naga-casing ukon nagapanilag sa ila balay halin pa sang nagligad nga tuig. Nakita man suno sa iya sang bata ni Poral si Guardaya sa guwa sang ila balay.
PAGPANGINWALA NI NILO GUARDAYA
Ginapanindugan ni Guardaya nga wala siya sang kahilabtanan sa krimen. Suno sa iya, wala siya nakahalin sa Guimbal sugod sang Agosto 4 kag sang Agosto 5, bilog nga adlaw siya nagpangsarahe sang kahoy.
Makapamatuod suno sa iya nga yara siya sa Guimbal ang iya asawa, tupad balay, kag ang nagpasarahe sang kahoy.
BACKGROUND NI GUARDAYA
Ginkumpirmar ni Iloilo Police Provincial Office (IPPO) Spokesperson, Police Major Rolando Araño nga may mga kaso nga estafa kag illegal logging si Guardaya pero na-areglo. May kaso man siya may kaangtanan sa vehicular accident.
May impormasyon man ang IPPO nga may kahilabtanan sa shooting incident sa Tigbauan si Guardaya sang 2020 pero wala naglab-ut sa pasakaay sang kaso. Gina-check pa sang Aksyon Radyo Iloilo ang detalye sang kaso.
Sa record naman sang ICPO, suspek man si Guardaya sa shooting incident sa Villa Anita, City Proper sang Marso 17 subong nga tuig.
“GUN FOR HIRE” SI GUARDAYA?
Suno kay Araño, may nabaton sila nga “raw information” nga “gun for hire” si Guardaya.
KASO VS. GUARDAYA
Ginpasakaan sang tatlo ka kaso si Guardaya — murder, illegal possession of firearm kag possession of drug paraphernalia may kaangtanan sa kamatayon ni Poral.
Ginkumpirmar sang police nga nagpositibo sa drug test si Guardaya. Preso siya gihapon sa La Paz Police Station.
SIN-O SI JERSON GENTAPAO?
Si Gentapao ang kaupod ni Guardaya sang gindakop siya sa Guimbal.
Suno kay Guardaya, helper niya sa pagpangsarahe si Gentapao. Suno sa police, wala sang kahilabtanan si Gentapao sa kaso nga pagpatay kay Poral kag natabuan lang nga updanay sila sang gindakop ang suspek.
Pasakaan sang kaso nga obstruction of justice si Gentapao. Gin-release siya tungod nag-lapse na ang reglementary period.
