Lookout kag gunman sa pagpatay kay anay Ingore, La Paz PB Ernie Poral lain nga tawo —police
ILOILO CITY – Indi lang isa ka suspect ang ginasundan sang La Paz police sa pagpatay kay former Ingore, La Paz Punong Barangay Ernie Poral sang Agosto 5 sang aga.
Suno kay Police Captain Marlon Perez, hepe sang Police Station 2, may lookout nga nagsunod kay Poral halin sa ila balay sang nagpadulong siya sa merkado agud magpangape.
Nakuhaan sang CCTV camera suno sa iya, sang naglabay ang lookout sakay sa motorsiklo nga nagasunod sa salakyan sang kapitan.
Nakita pa nga nagagamit sang cellphone ang lookout nga posible nagahatag sang impormasyon sa gunman.
Sang naglakat na padulong sa Baldoza, La Paz halin sa merkado si Poral, ang gunman na suno kay Perez ang nagsunod sakay sa motorsiklo.
Ginapanindugan ni Perez nga may nakakita kay Nilo Guardaya, suspect sa krimen, nga naga-standby sa merkado, pila ka oras antes ginpatay ang kapitan. Nagasantu suno sa iya, kay Guardaya ang description nga ginhatag sang testigo.
Base sa imbestigasyon sang police, lain ang lookout sa gunman nga nagpatay kay Poral.
Pagkatapos sang krimen, nagpadulong sa Ticud, La Paz ang suspek, naglabay pa-Tacas, Jaro, pa-C1 road, Oton padulong sa Guimbal. Samtang, wala na nasundan sang mga police kun diin nagpadulong ang lookout sang pag-abot sa merkado.
Wala man ginadula sang La Paz police nga ginbayaran lang ang mga suspek agud himuon ang krimen. Isa sa mga nagasuporta diri, ang nagaguwa sa imbestigasyon sang police nga gin-surveillance ang biktima antes ginpatay kag indi konektado si Poral kay Guardaya.
Ginpasiguro man ni Perez nga wala nagatutok sa isa lang ka motibo kundi gina-imbestigaran ang tanan nga anggulo lakip na ang mga nakontra ni Poral sang nagapangalagad siya nga kapitan kag mga kawsa nga iya ginapakigbato.
