State of calamity gindeklarar sa Passi City tungod sa pagdamo sang dengue cases
ILOILO — Gin-aprubahan sang Sangguniang Panlungsod sang Passi City ang rekomendasyon sang City Disaster Risk Reduction and Management Council nga magdeklarar sang state of calamity tungod sa nagataas nga kaso sang dengue.
Ini ang ginkumpirmar ni Passi City Disaster Risk Reduction and Management Office head, Engr. Lira Ladigohon.
Suno kay Ladigohon, Agosto 9 sang naghiwat sang special session ang SP kag gin-adoptar ang resolusyon sang CDRRMO.
May 353 na ka mga kaso sang dengue ang nalista sang City Health Office (CHO) sa Passi City.
Sa 51 ka mga barangays sa syudad, 45 na ang may positibo nga kaso sang dengue suno sa CHO.
Sa subong, masako ang CDRRMO sa lapnagon nga kampanya agud nga matapna ang dengue kag sige-sige man ang misting ukon ang pag-spray sang insecticide sa mga lugar nga ginapugaran sang mga lamok. —via Fraye Cedrick Anona
