3 ka ginatudlo high-ranking leaders sang NPA patay sa engkwentro sa Lambunao
ILOILO – Tatlo ka mga high-ranking leaders sang Communist Terrorist Group (CTG) ang napatay sa engkwentro sang 301st Infantry “Bayanihan” Brigade sang Philippine Army batuk sa gintingub nga puwersa sang Regional Headquarters (RHQ) kag Central Front, Komiteng Rehiyon-Panay (CF, KR-P) sang NPA sa Brgy. Cabatangan, Lambunao kahapon, Agosto 15.
Antes ang engkwentro, nadiskubrehan sang mga soldado ang ginapanaguan sang mga rebelde sa nasambit nga barangay sa diin nadiskubrehan ang bangkay ni Vicente Hinojales, ukon kilala kay Arjie/ Hadjie/LJ kahapon sang udto.
Si Hinojales ang ginatudlo nga NPA leader nga tumandok sang Matalam, North Cotabato kag nagaserbe nga Regional Secretary sang Komiteng Rehiyon-Panay.
Mga las-4:45 sang hapon, na-engkwentro sang tropa sang gobyerno ang ginabanta 10 ka mga miyembro sang Communist Party of the Philippines – New People’s Army (CPP-NPA). Duha ka bangkay ang nasapwan pagkatapos sang engkwentro.
Ginkilala sang Philippine Army ang duha kanday Maria Concepcion Araneta Bocala, mas kilala nga Concha, ang 1st Deputy Secretary sang KR-P kag NDF Consultant nga tumandok sang Manduriao, Iloilo City; kag Vivian Torato Teodosio, ukon Minerva/Mara/Moray, secretary sang Central Front, KR-Panay, residente sang Sta. Barbara, Iloilo.
Na-recover sang mga tropa ang lima ka high-powered firearms, lakip ang tatlo M16 Rifles, isa ka M79 grenade launcher, kag isa visor. May nakuha man nga shotgun, mga dokumento, kag personal nga kagamitan.
Subong nga bulan, anum ka mga engkwentro ang na-record sang Philippine Army batuk sa rebelde nga grupo sa diin 10 ang napatay sa Lambunao kag Calinog. —Philippine Army
