Barangay kapitan, tanod sang Sinikway, Lapuz ginreklamo nga nagpalupok sang pusil; kapitan gintawag nga “binutig nga istorya” ang alegasyon batuk sa iya

ILOILO CITY – Gin-akusaran sang mag-utod nga nagpalupok sang pusil si Sinikway, Lapuz Punong Barangay Felix Ventura kag isa ka tanod sa guwa sang ila balay kagab-i, Agosto 15.

Suno kay Alyas Lyn, mga las-5:30 sang hapon sang naglabay si Ventura sa guwa sang ila balay kag nakita niya nga may ginplastar nga lamesa ang iya utod nga si Toto kag may isa ka botelya sang ilimnon. Ginkuha suno sa iya sang kapitan ang ilimnon gani ginlagas sang iya utod agud agawon.

Gin-alegar naman ni Toto nga sang yara na sa sulod sang salakyan si Ventura, naggabot sang pusil ang kapitan rason nga kinulbaan siya. Sang naga-agaway ang duha sang ilimnon, nagpatunga si Lyn agud malikawan ang gamo.

Nagtawag suno kay Lyn sang police ang kapitan pero pag-responder nila natulugan na si Toto.

Mga las-9:30 sang gab-i, nag-inum-inom si Toto kaupod ang iya abyan sa sulod sang ila balay kag natabuan nga naglabay liwat si Ventura. Nagdiretso suno sa iya, si Ventura sa barangay hall agud magtawag sang mga tanod kag nagbalik sa guwa sang ila balay. Tatlo ka tanod ang nag-upod sa kapitan.

Pag-abot sang kapitan sa guwa sang ila balay, ginpasuni ni Toto nga ginbakol siya sang baratiya gani nagsulod siya, nagkuha sang martilyo kag ginpungkoy kay Ventura pero wala naigu.

Gin-alegar ni Toto nga nakita niya nga nagpalupok sang pusil sang makapila ka beses si Ventura nga ginataya pa sa langit. Samtang, ang iya naman abyan ang nakakita nga nagpalupok sang pusil ang isa ka tanod. May nakita si Toto nga basiyo sang bala sa atop sang ila balay.

Ginsiraduhan ni Toto ang ila balay agud makapangaman.

Gilayon man nga nagtawag sang police ang magulang ni Toto pero sang nagresponde, ginpahayag niya nga wala man nag-imbestigar.

Tungod sang natabo, ginpahayag ni Lyn nga tuman ang kakulba nga nabatyagan kag na-trauma ang iya duha ka kabataan kag apo nga yara sa second floor sang balay sang nagpalupok ang kapitan sang makatatlo ka beses.

Nagakahangawa man ang pamilya nga balikan sila sang kampo ni Ventura kasunod sang natabo.

SABAT NI PUNONG BARANGAY VENTURA

Gintawag ni Ventura nga “binutig nga istorya” ang alegasyon sang mag-utod batuk sa iya.

Suno sa kapitan, nalabayan niya sa guwa sang balay nga naga-inum sang makahulubog nga ilimnon si Toto gani ginkumpiskar niya ang ilimnon. Gin-athag niya nga may resolution ang barangay nga ginabawalan nga mag-inom sa kilid sang karsada.

Sa pagkamatuod, suno kay Ventura, adlaw-adlaw niya nga nakita nga may naga-inum-inom sa guwa sang balay sang mag-utod kag pila ka beses na niya ginsaway. Ini ang rason nga ginsaway niya liwat si Toto kahapon pero ginbuyayaw siya gani nagsabtanay sila nga duha.

Ginpanginwala man ni Ventura ang alegasyon nga ginbakol niya sang baratiya si Toto. Nagpalamanog man ang batiis niya sang naigu sang martilyo nga ginpungkoy ni Toto sa iya.

Magluwas diri, gin-deny man niya nga nagpalupok siya sang pusil. Wala man siya suno sa iya sang may nabatian nga lupok kag makapamatuod diri ang mga residente sa palibot.

Gin-akusaran man sang kapitan nga “problematic” ang tagreklamo tungod ginapasuni niya nga nagagamit sang illegal nga druga. —via Firingline